យុវជន​ដែល​ប្រឡងជាប់​បាក់ឌុប​ព្រួយបារម្ភ​អំពី​ការសិក្សា​នៅ​មហាវិទ្យាល័យ

លទ្ធផល​ប្រឡង​បាក់ឌុប​ដែល​ទើប​តែ​ត្រូវ​ បាន​ក្រសួង​អប់រំ​ប្រកាស​ថ្មីៗ​បាន​ធ្វើ​ឲ្យ​យុវជន​​ជា​ច្រើន​​ដែល​ប្រឡង​ ជាប់​សប្បាយ​ចិត្ត​។ ​​ប៉ុន្តែ​ក្នុង​ខណៈ​ដែល​ពួកគេ​ត្រៀម​ខ្លួន​ចូល​មហាវិទ្យាល័យ​​នៅ​ចុង​ឆ្នាំ ​នេះ​ សិស្ស​ដែល​ទើប​តែ​​ទទួល​បាន​សញ្ញាបត្រ​បាក់ឌុប​ថ្មីៗ​ មាន​ការ​ព្រួយ​​បារម្ភ​អំពី​ការ​ជ្រើសរើស​ជំនាញ​របស់ខ្លួន​ ពីព្រោះ​តែ​ពួក​គេ​មិន​ដឹង​ថា​ ខ្លួន​ឯង​ពូកែ​អ្វី​ ហើយ​ត្រួវ​​ជ្រើសរើស​មុខ​វិជ្ជា​អ្វី​យក​មក​សិក្សា​​បន្ត​នៅ​មហាវិទ្យាល័យ​ នោះ​ទេ​។

 សិស្ស​មួយ​ចំនួន​សម្រេច​ចិត្ត​ទៅ​តាម​ក្តី​ប្រាថ្នា​របស់​ឪពុក​ម្តាយ​ដែល​ មិន​ដឹង​ពី​សមត្ថភាព​របស់​កូន​នេះ​ ជា​ហេតុ​នាំ​ឲ្យ​ពួក​គេ​អាច​បោះបង់​ចោល​ការសិក្សា​។​ដោយឡែក​ សិស្ស​មួយចំនួន​​ទៀត​បាន​សម្រេចចិត្ត​ទៅ​តាម​តម្រូវការ​នៃ​ទីផ្សារ​ដោយ​មិន​ មើល​ពី​សមត្ថភាព​របស់​ខ្លួន​ទេ​ នេះ​ជា​ ​ហេតុ​ផល​​មួយ​ទៀត​​នាំ​អោយ​ពួក​គេ​មិន​បាន​ទទួល​ជោគជ័យ​នៅ​ក្នុង​ជីវិត​។​​ នេះ​ជា​អ្វី​ដែល​បាន​​និង​កំពុង​កើត​មាន​នៅ​កម្ពុជា​។

ការ​ជ្រើសរើស​បន្ត​ការ​សិក្សា​​នៅ​កម្រិតឧត្តម​សិក្សា​មុខវិជ្ជា​ដែល​សិស្ស​ រៀន​ ភាគ​ច្រើន​នោះ គឺ​ធនាគារ​ ហិរញ្ញវត្ថុ​ គណេនយ្យ​ ​ទីផ្សារ​ ​ភាសាអង់គ្លេស​ គ្រប់គ្រង​ និង​ច្បាប់​។​ ការ​កង្វះ​ខាត​នូវ​ពត៌មាន​​នៃការ​សិក្សា​នៅ​កម្រិត​ឧត្តមសិក្សា​របស់​សិស្ស​ ធ្វើ​ឲ្យ​ពួក​គាត់​ជ្រើសរើស​មុខ​វិជ្ជា​​ដែល​មិន​​សម​បំណង​របស់​ខ្លួន​។​ សិស្សខ្លះ​ ជ្រើសរើស​ទៅ​តាម​ការ​អូសទាញ​របស់​មិត្ត​ភ័ក្តិ​ ហើយ​ខ្លះ​ទៀត​​តាម​ឪពុកម្តាយ​របស់​ពួក​គេ​។

លោក​បណ្ឌិត​ សុខ​ ទូច​ សាកលវិទ្យាធិការ​នៃ​សាកលវិទ្យាល័យ​​ខេមរៈ​មាន​ប្រសាសន៍​ថា​ សិស្ស​ដែល​បញ្ចប់​បាក់ឌុប​មិន​បាន​ជ្រើសរើស​មុខ​វិជ្ជា​ដែល​ខ្លួន​ស្រឡាញ់​ និង​ពេញ​​ចិត្ត​​នោះ​ទេ​។ ភាគច្រើន​ ពួកគេ​ជ្រើសរើស​ទៅ​តាម​តែ​ទីផ្សារ​ការងារ​សព្វថៃ្ង​ តាម​អ្នក​ដែល​ផ្តល់​លុយ​អោយ​ និង​តាម​រយៈ​មិត្តភ័ក្តិ​។​ លោក​ថា​ ​ពួក​គេ​នឹង​ប្រឈម​មុខ​ជាមួយ​នឹង​កង្វះ​ការងារ​ធើ្វ​ និង​ធ្វើ​ការងារ​​មិន​ត្រូវ​តាម​មុខ​ជំនាញ​របស់​ខ្លួន​នា​ពេល​អនាគត​។​

ការ​ជ្រើសរើស​មុខវិជ្ជា​ខុស​ក្នុង​ការ​បន្ត​ការ​សិក្សា​នៅ​កម្រិត​ឧត្តម​ សិក្សា​ពិត​ជា​មាន​ផល​ប៉ះ​​ពាល់​ យ៉ាង​ខ្លាំង​ដល់​សង្គម​ដូចជា​ ភាព​គ្មាន​ការងារ​ធើ្វការ​ តាម​មិន​ទាន់​នៃ​បច្ចេកវិទ្យា​​នៅ​​ពេល​ ​បច្ចុប្បន្ន​ អនាគត​ ​និងការ​ប្រឈម​ចំពោះ​ទីផ្សារ​សេរី​នៃ​អាស៊ាន​ឆ្នាំ​២០១៥​ ។ យ៉ាង​ណា​​ក៏​ដោយ​  ក្រសួង​អប់រំ​ក៏​បាន​ចាប់​អារម្មណ៍​លើ​បញ្ហា​នេះ​ដែរ​។​

លោក​ សំ​ សេរី​រត្ន័​ អគ្គនាយក​ដ្ឋាន​​អប់រំ​​នៃ​​ក្រសួង​​អប់រំ​មាន​ប្រសាសន៍​ថា​ ​ក្រសួង​អប់រំ​បាន​ណែនាំ​ទៅ​ដល់​សិស្ស​ទាំងអស់​អំពី​មុខវិជ្ជា​នីមួយៗ​ដែល​ ពួក​គេ​ត្រូវ​ជ្រើសរើស​រួចហើយ ប៉ុន្តែ​ ​ការ​សម្រេចចិត្ត​​យ៉ាងណា​​នោះ​វា​អាស្រ័យ​ទៅ​លើ​សិស្ស​ទាំងអស់​នោះ​ ​ថា​តើ​មុខវិជ្ជា​មួយ​ណា​​ដែល​​ពួក​គេ​ពេញ​ចិត្ត​​។

ការ​សម្រេច​ចិត្ត​ដែល​ត្រឹមត្រូវ​ទាមទារ​ឲ្យ​សិស្ស​ទទួល​បាន​ព័ត៌មាន​ច្រើន​ ពី​មុខវិជ្ជា​ដែល​ខ្លួន​បម្រុង​នឹង​រៀន​តាម​រយៈ​សាកលវិទ្យាល័យ​នីមួយៗ​ដែល​ ខ្លួន​ចង់​ទៅ​រៀន​ និង​ការ​សាក​សួរ​​អ្នក​ដែល​ធ្លាប់​​មាន​បទពិសោធន៍​ពី​មុន​មក​។ ការ​ជ្រើសរើស​មុខវិជ្ជា​ដែល​ត្រូវ​នឹង​​សមត្ថភាព​ ​និង​ចំណង់​ចំណូល​ចិត្ត​របស់​ខ្លួន​គឺ​ជា​ការ​ត្រៀម​រៀបចំ​អនាគត​របស់​ខ្លួន ​សម្រាប់​ទីផ្សារ​ការងារ​​នា​ពេល​ខាង​មុខ​។​ នេះ​ជា​ដំបូន្មាន​របស់​ក្រុម​អ្នក​ជំនាញ​៕